Ájiniyaz atındaǵı Nókis mámleketlik pedagogikalıq institutında 2020/2021-oqıw jılı 1-kurs studentleri ushın 12-oktyabr sánesinen tanısıw sabaqları menen baslandı.

Dúnyada hám mámleketimizde júz berip atırǵan karantin sháráyatında, institut studentleri ushın sabaqlardı alıp barıw karantin talaplarına ámel qılǵan halda, belgilengen grafik tiykarında 2 smenada, 3 kún dawamında, 2 paradan aspaǵan halda shólkemlestiriw rejelestirilgen.

Reje tiykarında taza oqıw jılın shólkemlestiriwdiń birinshi kúninde studentlerdi bekitilgen gruppası, topar basshısı, institut táriyxı, dúzilmesi, basshıları, oqıw processi h.t.b lar menen keńnen tanıstırıw belgilep alınǵan bolıp, bul jumıslardıń barlıǵı reje tiykarında tolıq ámelge asırıldı.

Institutımızdıń “Mektepke shekemgi tálim” fakultetinde 1-kursqa qabıl etilgen talabalar menen tanısıw sabaqları kóterińki ruwxta shólkemlestirildi. Fakultet dekanı M.Allambergenova, kafedra baslıǵı A.Bekimbetova, jaslar menen islesiw boyınsha dekan orınbasarı D.Bektursinovlar oqıwǵa qabıl etilgen studentlerge instituttaǵı oqıtıw processi, kafedralar quramı, oqıtılatuǵın pánler, kredit-modul sistemasında oqıw tártibi haqqında keńnen túsinikler berdi. Sonday-aq kafedra oqıtıwshıları studentlerdi institut, fakultet, kafedralar menen tanıstırıwda aldınnan tayarlap qoyılǵan buklet, prezentaciya hám multimedia qurallarınan paydalanıp qızıqlı tárizde sabaq processin alıp bardı.

Biz isenemiz institut studenti bolıw baxtına miyassar bolǵanlar, tájiriybeli professor oqıtıwshılardan oqıw barısında bilim hám kónlikpelerdi iyeleydi hám mámleketimizde belgili statusqa iye jetik kadr bolıp jetilisiwine tilekles bildirip, aldaǵı oqıwlarında tasqın tabıslar tilep qalamız.

Mektepke shekemgi tárbiya hám defektologiya kafedrası assistent-oqıtıwshısı Djumabaeva Gulbanu